Aðeins um fjórðungur þeirra grunnskólakennara sem kenna stærðfræði og náttúrugreinar er sérhæfður í þeim. Hlutfallið er um 21% í íslenskukennslu og 12% í íslensku sem öðru máli. Þetta kemur fram í niðurstöðum nýrrar könnunar mennta- og barnamálaráðuneytisins . Freyja Hreinsdóttir, forseti menntavísindasviðs HÍ og prófessor í stærðfræði og stærðfræðimenntun, segir niðurstöðurnar ekki koma á óvart. Varpi ljósi á kerfislægan veikleika „Ég held að þetta sé mjög alvarlegt mál sem þurfi að skoða betur. Ég held að ríkisvaldið þurfi að gera eitthvað í því til að hvetja fleiri kennaranema eða kennara til að sérhæfa sig í þessum greinum þar sem okkur vantar svona mikið fólk,“ segir hún. Freyja segir að ein skýring gæti verið að kennarar færi sig yfir í framhaldsskóla – en til þess þarf sama leyfisbréf. Mennta- og barnamálaráðuneytið segir að niðurstöðurnar varpi ljósi á kerfislægan veikleika sem geti haft áhrif á gæði kennslu og tækifæri nemenda í framhalds- og háskóla. „Ráðuneytið er nú með í undirbúningi markvissar aðgerðir til að bregðast við niðurstöðunum í samstarfi við háskóla sem mennta kennara, sveitarfélög, skólastjórnendur og aðra hagaðila,“ segir í fréttatilkynningu. Enginn sem kenndi náttúrufræði á Austurlandi sérhæfður Samkvæmt niðurstöðum ráðuneytisins bera kennarar utan höfuðborgarsvæðisins gjarnan ábyrgð á kennslu námsgreina sem þeir eru ekki sérhæfðir í. Af þeim skólum sem svöruðu könnuninni á Austurlandi var enginn kennari sem kenndi náttúrufræði með sérhæfingu á því sviði. Hlutfallið var hins vegar 38 prósent á höfuðborgarsvæðinu. „Auðvitað er þetta alvarlegt mál. Nemendur í þessum skólum eiga sama rétt og aðrir að fá góða kennslu,“ segir Freyja.