„Þetta er út af fyrir sig þokkalegasti fiskur en stórþorskurinn virðist mikið til horfinn. Fyrir vikið hafa menn smækkað riðilinn. Við erum núna með net með átta tommu riðli en á sama tíma í fyrra var níu tomman alls ráðandi,“ segir Guðjón Bragason, skipstjóri á Dagnýju GK, sem var í öðrum róðri ársins. Margar kenningar um minnkandi þorskgengd Að sögn Guðjóns eru uppi margar kenningar um minnkandi þorskgengd og slakan afla í haust sem leið og nú í vetur. Bent hefur verið á að sjávarhiti hafi verið mjög hár fram eftir vetri og Guðjón segist ekki í vafa um að það kunni að hafa haft mikil áhrif á göngu þorsks og annarra fisktegunda. Þá hafi vantað vestan- og suðvestanbrælur en það sé þekkt staðreynd að afli í net og fleiri veiðarfæri glæðist oft verulega við suðvesturhorn landsins í hressilegum sunnan- og suðvestanbrælum. Ekki endalaust hægt að gera út á stærsta þorskinn Guðjón Bragasson skipstjóri. Annað, sem Guðjón segir að sé áberandi, er að stærsti hrygningarþorskurinn virðist hafa verið ofveiddur undanfarin ár og því hafi hin stórriðnu net ekki gefið eins góðan afla og á meðan stærsti þorskurinn var til staðar. „Það er ekki endalaust hægt að gera út á þennan stærsta þorsk með níu tommu netum og þaðan af stærri riðli. Stærsti þorskurinn hefur látið á sjá og menn eru að átta sig á því núna. Það hafa allir verið að smækka við sig riðilinn og átta tomman er að verða alls ráðandi. Þá má ekki gera lítið úr vindáttinni og áhrifum hennar. Það hefur legið í austlægum og norðaustlægum áttum í allan vetur og það kann ekki góðri lukku að stýra hér í þessum landshluta,“ segir Guðjón. Örvænta ekki þótt haustið og veturinn hafi verið í daprara lagi Dagný GK fór í tvo róðra á milli jóla og áramóta og segir Guðjón að þokkalegur afli hafi fengist í þeim báðum. Róið er með sjö netatrossur og eru 12 net í hverri. „Það var ágætis kropp hjá okkur. Við dóluðum hér suður með Stafnesinu og Hafnarberginu og fengum 12 tonn af þokkalegasta þorski í hvorum róðri. Þetta var svona hefðbundið fjörufiskerí og þorskurinn var mikið þetta frá fimm og upp í tíu kíló af þyngd. Mest var um sex til sjö kílóa þorsk. Þetta er auðvitað fínasti þorskur en gaman hefði verið að fá eitthvað af stærri þorski með,“ segir Guðjón en hann segir sjómenn ekki örvænta þótt haustið og veturinn hafi verið í daprara lagi hjá netabátunum. Menn voru ekki upplitsdjarfir eftir nóvember Fiskifréttir 8. janúar 1999. „Ég neita því ekki að menn voru ekki upplitsdjarfir eftir nóvembermánuð enda voru aflabrögðin þá hörmuleg. Hið sama gilti um snurvoðarbátana en hins vegar voru línubátarnir að gera þokkalega hluti. Við urðum varir við það í haust þegar við vorum á ýsunetum að línubátarnir voru að fá fínasta afla allt í kringum okkur en það fékkst ekkert í netin eða snurvoðina. Þetta segir manni að fiskurinn hafi verið mjög dreifður í sjónum. Það kann vel að vera að það hafi verið nóg af honum en hann þétti sig ekki fyrir okkur netakarlana svo mikið er víst, segir Guðjón. Ýmislegt bendi til þess að aflabrögðin kunni að fara að glæðast. Ufsaveiði í net hafi gjörsamlega brugðist „Það fengu nokkrir bátar ágætan afla á milli hátíða og nú um helgina voru bátar eins og Hringur frá Hafnarfirði, Happasæll og Gunnar Hámundarson að fá ágætan afla í netin norður af Garðskaganum og inn undir svokölluðum rennum. Þá fékk Haförn ein 14 tonn af þorski í tveimur hölum í snurvoðina sl. laugardag þannig að ég trúi því að þetta sé allt að koma. Ufsinn er horfinn og kolinn líka.“ Í samtalinu við Guðjón kemur fram að ufsaveiði hafi oft verið mjög góð í netin að haustlagi og einnig eftir áramótin en nú sé óhætt að fullyrða að ufsaveiði í net hafi gjörsamlega brugðist sl. fjögur ár eða svo. Ufsinn horfinn „Ég veit ekki hverju maður á að trúa en ég trúi því ekki að það sé mikið til af ufsa. Ef undan er skilið smá skot sem Ósk KE fékk í netin á hér suður í Röstinni í haust þá hafa netamenn ekki riðið feitum hesti frá ufsaveiðunum. Nokkrir bátar fengu reyndar þokkalegan afla norðvestur af Garðskaganum fyrir rúmu ári síðan en það er allt og sumt. Þegar hægt er að telja það saman á fingrum annarrar handar hvenær menn telja sig hafa fengið þokkalegan ufsaafla á meira en einu ári þá er staðan alvarleg. Hér fyrir nokkrum árum gátu menn gengið að því vísu að fá góðan ufsaafla á haustin og menn gerðu út á þessar veiðar og gátu bókað söludaga í Þýskalandi og staðið við þá. Það er liðin tíð,“ segir Guðjón. „Kolinn er gjörsamlega búinn“ Þess má geta að Dagný GK var gerð út á snurvoð í ágúst og september sl. og var þá aðallega verið að reyna að veiða kola á Hafnarleirum og suður á Sandvíkinni. „Kolinn er gjörsamlega búinn á þessum slóðum. Við fengum reyndar dágóðan sandkolaafla til að byrja með og töluvert af skrápflúru en skarkolinn er alveg horfinn. Síðan dalaði sandkolaaflinn og þótt það væri hægt að veiða skráp þá kom það út á eitt. Skrápurinn seldist ekki og við urðum að landa honum í gúanó,“ segir Guðjón. „Verður bara að koma í ljós hvernig það gengur“ Þrátt fyrir þetta reiknar Guðjón með því að þráðurinn verði tekinn upp á kolaveiðunum að nýju í byrjun febrúar. „Við erum með kvótalítið skip og það er ekki um annað að ræða en að reyna að fiska þessi kolablöð sem það hefur í kvóta. Við munum einnig reyna við ýsuna og það verður bara að koma í ljós hvernig það gengur.“