Atvinnustefnuráð forsætisráðherra telur að í nýrri atvinnustefnu stjórnvalda og aðgerðaáætlun henni tengdri vanti ýmis atriði, eins og aðgerðir varðandi umbætur á vinnumarkaði, stöðugt gengi og samkeppnishæfa skattastefnu, „jafnvel þótt þau séu lykilþættir atvinnustefnu“. „Þetta eru engin smámál, þau eru grundvallaratriði fyrir rekstur farsælla útflutningsfyrirtækja. Slík fyrirtæki huga að skattaívilnunum við staðsetningu starfsemi sinnar; því verður uppbygging íslenska skattkerfisins að vera sambærileg við skattkerfið í „samkeppnisríkjum“,“ segir í fyrstu stöðuskýrslu ráðsins sem var skipað í september sl. Ráðið segir jafnframt að það valdi áhyggjum að sjá að endurgreiðsla skatta til fyrirtækja vegna fjárfestinga í rannsóknum og þróun „líður fyrir óleyst framkvæmdavandræði“. Í stöðuskýrslunni er mælir með því að stjórnvöld reyni að finna „ávexti í augnhæð“, þ.e. markmið sem hægt er að ná á skömmum tíma, til áð komast áleiðis með markmið nýrrar atvinnustefnu. „Eitt slíkt væri að auka fjárfestingu í rannsóknum og þróun í 3% af landsframleiðslu, í samræmi við markmið ESB.“ Eins og Viðskiptablaðið hefur fjallað um hefur samþykktum umsóknum fyrirtækja til Rannís um endurgreiðslur dregist talsvert saman og hugverkageirinn hefur lýst áhyggjum af seinagangi og óskýrleika í svörum stofnunarinnar. Sjá einnig Telja breytta stefnu hjá Rann­ís ógna nýsköpun Ráðið telur jafnframt að hlutverk háskóla sé vanmetið í núverandi útgáfu atvinnustefnunnar. „Það nægir ekki að leggja áherslu á nauðsyn þess að auka menntun í raun - og tæknigreinum. Þess í stað gæti þurft endurskipulagningu á háskólakerfinu til að bæta árangur, fjölga útskrifuðum stúdentum í raunvísindum, tæknigreinum og verkfræði (STEM) og auðvelda hraðari þekkingarmiðlun milli atvinnulífs og háskóla.“ Kristrún Frostadóttir forsætisráðherra kynnti síðasta haust áform um nýja atvinnustefnu til ársins 2025. Ríkisstjórnin samþykkti nýja atvinnustefnu Íslands þann 10. apríl en með henni fylgdi aðgerðaráætlun til áranna 2026-2027 þar sem settar eru fram 35 aðgerðir til að stuðla að markvissri innleiðingu stefnunnar. Einstakir ráðherrar beri fulla ábyrgð Atvinnustefnuráðið segir mikilvægt að aðgerðaráætlunin sé raust með sérstökum og eyrnamerktum fjárveitingum fyrir hinar ýmsu aðgerðir. Ráðið leggur til að slíkur fjárhagsrammi sé útfærður og verði hluti af fjárlögum ríkisstjórnarinnar. Ráðið leggur áherslu á að hver aðgerð hafi mælanlega afurð. Jafnframt er ríkisstjórnin hvött til þess að forgangsraða og einbeita sér að aðgerðum sem skipa sköpum. Ráðið leggur til að einstakir ráðherrar taki fulla ábyrgð á þeim hlutum aðgerðaáætlunarinnar sem falla undir þeirra verksvið, til að tryggja skilvirka framkvæmd. „Jafnframt eiga þeir að svara fyrir sína þætti. Ráðið mun fylgjast með framvindu mála hjá ráðuneytunum.“ Ráðið hvetur einnig til þess að allir stjórnmálaflokkar á þingi fái að eiga hlut að stefnunni, til að tryggja samfellu „enda mun framkvæmd atvinnustefnunnar taka meira en eitt kjörtímabil“. Sjá einnig Kristrún skipar í atvinnustefnuráð Í atvinnustefnuráðinu sitja Nana Bule, Robert-Jan Smits, Gylfi Zoëga, Pétur Þ. Óskarsson og Tanya Zharov. Atvinnustefna setji nýjan tón Ráðið segir að hingað til hafi hagvöxtur á Íslandi að mestu leyti stafað af magnaukningu. „Á sjötta, sjöunda og áttunda áratugnum færði Ísland landhelgi sína út í 200 mílur og endurnýjaði og stækkaði togaraflota sinn. Frá og með sjöunda áratugnum hóf Ísland að flytja út orku í gegnum orkufrekar atvinnugreinar, svo sem álver, með því að nota raforkuvinnslu landsins, flytja inn hráefni og á þann hátt skapa verðmæti fyrir landið. Síðastliðin 15 ár hefur vöxturinn fyrst og fremst verið knúinn áfram af ört vaxandi ferðaþjónustu, sem nýtir sér einstaka náttúru landsins og hefur dregið að vaxandi alþjóðlegt vinnuafl. Enn fremur dró úr framleiðnivexti á Íslandi eftir fjármálakreppuna árið 2008 en hefur aukist á ný síðan, þótt það sé á hóflegri hraða en fyrir kreppuna. Ráðið er sammála því að áhersla atvinnustefnunnar á framleiðnivöxt sé rétt mæt.“ Ráðið segir atvinnustefnuna setja nýjan tón en með henni sé áherslan lögð á vöxt umfram magnaukningu, með aukinni framleiðni í öllum útflutningsgreinum að leiðarljósi.