Íslenskt lambakjöt hefur á undanförnum árum unnið hörðum höndum að því að kynna lambakjöt fyrir bæði ferðamönnum og innlendum markaði. Mikil vinna hefur þá sérstaklega verið lögð í að leggja áherslu á ferskleika, uppruna og sérstöðu vörunnar. Félagið hefur einnig verið að breyta markaðsherferðunum til að geta gefið sauðfjárbændum meiri sýnileika. Íslenskt lambakjöt vill að bændur fái að segja sínar sögur til að gefa Íslendingum tækifæri á að kynnast starfseminni betur og vinnunni sem fer í sauðfjárrækt. Hafliði Halldórsson, framkvæmdastjóri Íslensks lambakjöts, segir að forsvarsmenn félagsins hafi á undanförnum misserum heimsótt sveitabæi um allt land, meðal annars á Austurlandi og norður í Fljótum, til að miðla þessum upplýsingum til neytenda. „Hingað til hefur markaðssetningin verið þannig að bændur sjást vinna í bakgrunninum á meðan leikari les yfir myndskeiðið. Við viljum setja bóndann í fyrsta sæti og leyfa honum að tjá sig án þess að við leikstýrum því með einhverjum hætti.“ Sjá einnig Lamba- og nautakjöt hækkað mest á fimm árum Hann segir í samtali við Viðskiptablaðið að margir neytendur á Íslandi geri sér kannski ekki fulla grein fyrir allri þeirri vinnu sem fer í sauðfjárrækt og framleiðslu á lambakjöti og telur að fleiri myndu sjá verðmæti vörunnar samhliða auknum skilningi. „Íslenskt lamb er í mikilli sérstöðu þar sem dýrin eru úti á beit á villtum gróðri frekar en að vera afgirt inni á túnum eins og tíðkast víðast. Fyrir vikið er þetta mjög verðmæt vara og mikilvægur hluti af okkar matarmenningu. Íslenskt lambakjöt er eitthvað sem við eigum að tala meira upp.“ Einfaldari og aðgengilegri Þegar kemur að markaðnum segir Hafliði að hann myndi vilja sjá fleiri valkosti í verslunum. Margir neytendur eigi það til að líta á lambakjöt með hátíðaraugum og velji sér annað kjöt í miðri viku þar sem ímyndin af lambakjöti er gjarnan heilt læri fyrir stórt matarboð. „Eftirspurnin myndi líka fylgja eftir kjöti frá framúrskarandi bændum en á meðan lambakjötið er ekki upprunamerkt þá rennur það tækifæri fram hjá okkur.“ „Mér finnst að það mætti alveg setja meira púður í vöruþróun með lambið. Það eru til dæmis mjög fáir sem kaupa heilt læri í miðri viku og það þarf að gera aðgengilegar vörur sem fólk getur eldað á innan við hálftíma sem geta keppt við aðrar kjöttegundir.“ Hafliði fagnar þó þróuninni sem hefur orðið á undanförnum árum og minnist til að mynda á samstarfsverkefnið við N1 frá 2018 þegar fyrirtækið byrjaði að bjóða upp á íslenska kjötsúpu samhliða hamborgurum og frönskum á bensínstöðvum sínum. „Lambakjötið er líka öðruvísi eftir svæðum og ég tel að ef kjötið væri upprunamerkt þá væri aukinn vilji meðal neytenda til að borga meira ef þeir vita hvaðan varan kemur. Eftirspurnin myndi líka fylgja eftir kjöti frá framúrskarandi bændum en á meðan lambakjötið er ekki upprunamerkt þá rennur það tækifæri fram hjá okkur.“