Ljósleiðarinn hefur fengið tvo nýja leiðtoga til liðs við sig með ráðningu Ástu Ólafsdóttur sem forstöðukonu Sölu og þjónustu og Sigurðar Péturs Oddssonar sem leiðtoga sölu og viðskiptaþróunar. Ásta Ólafsdóttir hefur þá tekið við starfi forstöðukonu Sölu og þjónustu en hún kemur til starfa með víðtæka reynslu af stjórnun, sölu og þjónustu. Undanfarin ár hefur hún starfað hjá Origo, fyrst sem þjónustustjóri í skýja- og netrekstri og síðar sem forstöðukona rekstrarþjónustu. Áður starfaði Ásta hjá Nova í um níu ár þar sem hún gegndi fjölbreyttum stjórnunarhlutverkum og leiddi meðal annars sölu- og þjónustu á bæði einstaklings- og fyrirtækjamarkaði. „Ljósleiðarinn er spennandi fyrirtæki með mikilvægt hlutverk í samfélaginu okkar. Ég hef alla tíð lagt áherslu á framúrskarandi upplifun viðskiptavina og hlakka til að vinna með öflugu starfsfólki að því að efla þjónustuna enn frekar og styðja við áframhaldandi vöxt félagsins,“ segir Ásta. Sigurður Pétur Oddsson hefur hafið störf sem leiðtogi sölu og viðskiptaþróunar. Hann er með víðtæka reynslu af viðskiptaþróun, nýsköpun og þróun þjónustu- og tæknilausna. Sjá einnig Þuríður ráðin fram­kvæmdastýra Ljós­leiðarans Hann kemur til Ljósleiðarans frá Isavia þar sem hann starfaði síðast við viðskiptaþróun með áherslu á upplifun farþega, stafræna þróun og umbætur í rekstri. Áður gegndi hann þróunarhlutverkum hjá Sýn og Þekkingu með áherslu á viðskiptaþróun, þróun nýrra vara og þjónustu auk umbreytingarverkefna. Hann er með meistaragráðu í markaðsfræði frá Háskólanum á Bifröst og BS-gráðu í viðskiptafræði. „Ég er mjög spenntur að ganga til liðs við Ljósleiðarann. Íslenskt samfélag treystir á innviði Ljósleiðarans á hverjum degi og félagið gegnir lykilhlutverki í stafrænni uppbyggingu landsins. Tækifærin fram undan eru gríðarleg og ég hlakka til að vinna með framúrskarandi teymi Ljósleiðarans að áframhaldandi vexti, sterkum viðskiptasamböndum og þróun lausna sem skapa virði fyrir viðskiptavini og samfélagið í heild,“ segir Sigurður. Þuríður Björg Guðnadóttir, framkvæmdastýra Ljósleiðarans, segir það mikið fagnaðarefni að fá Ástu og Sigurð í hópinn. „Þau búa yfir fjölbreyttri reynslu og þekkingu sem mun nýtast okkur vel í áframhaldandi uppbyggingu Ljósleiðarans.“