Nanna Margrét Gunnlaugsdóttir, þingmaður Miðflokksins, hefur lagt fram þingsályktunartillögu um til laga um einföldun regluverks og afnám gullhúðunar úr lögum um aðgerðir gegn peningaþvætti og fjármögnun hryðjuverka. Umrædd lög hafa verið talsvert til umfjöllunar í kjölfar þess að Samtök verslunar og þjónustu (SVÞ) gagnrýndu innleiðingu peningaþvættisreglnanna hér á landi og sögðu hana hafa leitt til aukins eftirlits, meiri kostnaðar og umtalsverðs ónæðis fyrir bæði fyrirtæki og almenning. Víðtæk gullhúðun Í greinargerð þingsályktunartillögunnar bendir Nanna Margrét á gildissvið íslensku laganna sé víðtækara en lágmarkskröfur Evróputilskipunarinnar sem lögin byggja á segja til um, m.a. með því að taka til lífeyrissjóða, bókhaldsþjónustu og fasteignafélaga. Þá séu bíla-, skipa- og fyrirtækjasalar tilkynningarskyldir samkvæmt íslenskum lögum óháð fjárhæð viðskipta. Tilskipunin geri hins vegar eingöngu kröfu um slíka skyldu vegna reiðufjárviðskipta sem nema 10.000 evrum eða meira. Nanna Margrét bendir einnig á að tilskipunin heimili ríkjum að undanskilja einstaklinga sem stunda fjármálastarfsemi stöku sinnum eða að mjög takmörkuðu leyti og ef áhættumat sýni litla áhættu. Hún segir þessa heimild ekki hafa verið leidda í lög sem almenna undanþágu, heldur sé aðeins mælt fyrir um takmarkaða undanþágu fyrir aðila sem veita gjaldeyrisskiptaþjónustu. Heimild tilskipunarinnar til að veita undanþágu vegna fjármálastarfsemi í takmörkuðum mæli (3. mgr. 2. gr.) hefur ekki verið leidd í lög sem almenn undanþága. Einungis gjaldeyrisskipti geta talist undanþegin að uppfylltum ákveðnum skilyrðum. Vegna hins víðtæka gildissviðs laganna þurfa fjölmargir aðilar að uppfylla ítarlegar skyldur (áhættumat, stefnumótun, eftirlit og tilkynningar til skrifstofu fjármálagerninga lögreglu). „Vegna hins víðtæka gildissviðs laganna þurfa fjölmargir aðilar að uppfylla ítarlegar skyldur (áhættumat, stefnumótun, eftirlit og tilkynningar til skrifstofu fjármálagerninga lögreglu).“ Að lokum bendir hún á að heimild til að miða við 10.000 evra viðmiðunarmörk (þröskuld) fyrir vörusala hafi ekki verið innleidd. Tilgangurinn geti snúist upp í andhverfu sína Nanna Margrét leggur til að dómsmálaráðherra verði falið að leggja fram lagafrumvarp um afnám gullhúðunar úr núgildandi lögum um aðgerðir gegn peningaþvætti og fjármögnun hryðjuverka, og að í frumvarpinu verði leitast við að nýta eins og frekast er kostur þær lágmarkskröfur sem Evróputilskipunin gerir ráð fyrir „í stað þess að ganga lengra eins og gert er í núverandi löggjöf“. „Það sem þarf að hafa sérstaklega í huga þegar einföldun er skoðuð er að fjármálafyrirtæki eru í yfirburðastöðu til að kanna uppruna fjármagns. Flest viðskipti eru þess eðlis að tilfærslur peninga koma frá banka. Því er það tvívinna að aðilar sem taka við peningum sem eru millifærðir frá banka þurfi að gera könnun á uppruna fjármagns sem bankinn hefur þegar framkvæmt,“ segir í greinargerð tillögunnar. „Þessir sömu aðilar eru eigi að síður settir í þá stöðu að afla þeirra upplýsinga með tilheyrandi kostnaði sem að lokum lendir alltaf á neytendum.“ Nanna Margrét segir að með því að reyna að fylgja eftir lögum gæti tilgangurinn snúist upp í andhverfu sína. Í stað þess að vinnan snúi að því að gæta hagsmuna viðskiptavinarins fari tíminn í að afla gagna um viðskiptavininn og í flestum tilfellum frá bankanum sem peningarnir koma frá. „Víða erlendis er mikil umræða um aukna skriffinnsku og kostnað sem fylgir sambærilegri löggjöf og rætt um fyrirhugaðar breytingar til einföldunar. Hér á landi er lítill markaður og erum við því í einstakri stöðu til að gera lög um peningaþvætti skýrari og skilvirkari fyrir alla aðila máls og því er þessi þingsályktunartillaga lögð fram.“