Lögreglan á höfuðborgarsvæðinu hefur til rannsóknar atvik sem varð við verslunarmiðstöðina Fjörð í Hafnarfirði síðastliðið laugardagskvöld. Tilkynning barst um ellefuleytið um meðvitundarlausa unglingstúlku, sem hugsanlega hafði orðið fyrir líkamsárás. Ásdís Haraldsdóttir lögreglufulltrúi staðfestir þetta í samtali við fréttastofu. Stúlkan er 15 ára gömul og því enn á grunnskólaaldri. Hún var meðvitundarlaus þegar lögregla koma á staðinn og með talsverða áverka. Á svæðinu var hópur ungmenna sem talinn er tengjast málinu. Stúlkan er á batavegi en líðan hennar er eftir atvikum. Lögregla vinnur nú að því að afla upplýsinga en gefur ekki upp hvort einhver hafi verið handtekinn eða yfirheyrður vegna málsins.