Verðbólguálag á ís­lenskum skulda­bréfa­markaði hefur lækkað veru­lega frá síðustu vaxtaákvörðun Seðla­banka Ís­lands. Sam­kvæmt gögnum frá markaðsviðskiptum Arion banka hefur verðbólguálag til fjögurra ára lækkað um 41 punkt og álag til tíu ára um 20 punkta frá vaxtaákvörðuninni. Lækkunin er mest á styttri enda ferilsins, en nær engu að síður yfir allan líftíma­ferilinn. Verðbólguálag er mæli­kvarði á verðbólgu­væntingar markaðarins. Það er al­mennt reiknað sem munurinn á ávöxtunar­kröfu óverð­tryggðra ríkis­bréfa og verð­tryggðra ríkis­bréfa með sam­bæri­legan líftíma. Ef óverð­tryggt bréf ber til dæmis mun hærri ávöxtunar­kröfu en verð­tryggt bréf með svipaðan líftíma endur­speglar munurinn meðal annars væntingar fjár­festa um verðbólgu á tíma­bilinu. Skilaboðin náðu til skuldabréfafjárfesta Mælikvarðinn er þó ekki hrein spá um verðbólgu. Í verðbólguálagi getur einnig falist áhættuálag ásamt álagi sem tengist framboði og eftirspurn einstakra flokka svo dæmi séu tekin. Þrátt fyrir það er þróun verðbólguálags mikilvæg vísbending um hvernig markaðurinn metur verðbólguhorfur og trúverðugleika peningastefnunnar. Lækkunin kemur í kjölfar síðustu vaxtaákvörðunar Seðlabankans, þegar bankinn hækkaði vexti í 7,75% þann 20. maí síðastliðinn. Peningastefnunefndin sendi einnig þau skilaboð að hún væri reiðubúin að herða aðhald til að ná verðbólgu niður og festa verðbólguvæntingar betur við markmið. Viðbrögðin á skuldabréfamarkaði benda til þess að fjárfestar hafi tekið skilaboðin alvarlega. Á fjögurra ára líftíma lækkaði verðbólguálagið úr um 4,23% í um 3,82%, sam­kvæmt af­lestri af markaðs­gögnum. Á tíu ára líftíma lækkaði álagið úr um 3,93% í um 3,74%. Lækkunin er því um­tals­verðust á þeim hluta ferilsins þar sem væntingar um verðbólgu næstu ára skipta mestu fyrir vaxta­stefnu Seðla­bankans. Lengri endinn hefur einnig færst niður, en minna. Það getur bent til þess að markaðurinn hafi fremur endur­metið verðbólgu­horfur næstu ára en langtíma­verðbólgu­væntingar. Tíu ára álagið er þó enn vel yfir 2,5% verðbólgu­mark­miði Seðla­bankans. Lækkun verðbólguálags getur haft áhrif á verðlagningu ríkis­bréfa, fjár­mögnunar­kostnað og væntingar um næstu skref peninga­stefnu­nefndar. Ef þróunin heldur áfram gæti það styrkt þá mynd að aðhald bankans sé farið að bíta á væntingar markaðarins. Á móti þarf að fara var­lega í túlkunina. Skulda­bréfa­markaður getur hreyfst hratt eftir stórar vaxtaákvarðanir og ein­stakar breytingar á fram­boði, eftir­spurn eða stöðutöku fjár­festa geta haft áhrif á álagið. Engu að síður, líkt á sjá má á myndinni hér að neðan frá marmsmánuði, hefur orðið töluverð breyting á álaginu frá því sem var.