Eftir­spurn eftir hlut­deildar­lánum í maí var nær þreföld á við það fjár­magn sem var til út­hlutunar hjá Húsnæðis- og mann­virkja­stofnun. Alls voru 458 milljónir króna til út­hlutunar í mánuðinum, líkt og í fyrri út­hlutunum ársins, en sótt var um hlut­deildar­lán fyrir um 1.300 milljónir króna. Þetta kemur fram í til­kynningu frá HMS. HMS hefur lokið við út­hlutun hlut­deildar­lána í maí. Alls voru 78 um­sóknir til yfir­ferðar, þar af 36 um­sóknir sem bárust í fyrri mánuðum ársins. Í lang­flestum um­sóknum lá fyrir samþykkt kaup­til­boð í fast­eign sem hafði verið samþykkt af HMS og upp­fyllti skil­yrði hlut­deildar­lána. Slíkar um­sóknir njóta for­gangs um­fram um­sóknir þar sem kaup­til­boð liggur ekki fyrir. Eftir yfir­ferð HMS upp­fylltu 63 um­sóknir öll skil­yrði til út­hlutunar. Heildar­fjár­hæð þeirra nam um 985 milljónum króna. Þar sem um­sótt fjár­hæð var um­fram það fjár­magn sem var til út­hlutunar þurfti að velja af handa­hófi úr hópi um­sókna sem upp­fylltu öll skil­yrði. Þetta er þriðji mánuðurinn í röð sem slíku fyrir­komu­lagi er beitt. Alls voru 33 um­sóknir dregnar út af full­trúa sýslu­mannsins á höfuð­borgar­svæðinu, í samræmi við for­gangs­reglur út­hlutunar. Heildar­fjár­hæð út­hlutaðra lána nam um 530 milljónum króna. Sam­tals hlutu 30 um­sækj­endur ekki út­hlutun í maí þrátt fyrir að upp­fylla öll skil­yrði. Þeim hefur verið boðið að halda um­sókn sinni opinni og færa hana yfir í út­hlutun í júní. Hlut­deildar­lán eru veitt til kaupa á nýjum íbúðum og eru ætluð fyrstu kaup­endum, sem og þeim sem ekki hafa átt fast­eign síðustu fimm ár og eru undir til­teknum tekjumörkum. Mark­mið lánanna er að að­stoða fyrstu kaup­endur við að komast inn á húsnæðis­markaðinn með því að brúa bilið við fast­eigna­kaup.