Stjórnir SL líf­eyris­sjóðs og Al­menna-Lífs­verks líf­eyris­sjóðsins hafa ákveðið að hefja könnunar­viðræður um mögu­lega sam­einingu sjóðanna. Þetta kemur fram í til­kynningu frá stjórnum sjóðanna. Mark­mið viðræðnanna er að kanna hvort sam­einaður líf­eyris­sjóður myndi skapa sterkari grunn fyrir hagstæð og trygg líf­eyris­réttindi sjóðfélaga beggja sjóða, bæta þjónustu við sjóðfélaga og hvort sam­legðaráhrif myndu leiða til hag­ræðingar í rekstri. Verði af sam­einingunni yrði hinn sam­einaði sjóður fjórði stærsti líf­eyris­sjóður landsins. Heildar­eignir hans næmu 1.035 milljörðum króna miðað við stöðu eigna í lok síðasta árs. Viðræðurnar eru á frum­stigi en stefnt er að því að þeim ljúki fyrir mitt sumar. Náist sam­komu­lag verða til­lögur um sam­einingu sjóðanna og breytingar á samþykktum lagðar fyrir stjórnar- og sjóðfélaga­fundi í haust. Mark­miðið er að sjóðirnir sam­einist 1. janúar 2027. Sam­einingin er háð samþykki fjár­mála- og efna­hags­ráðu­neytisins að fenginni um­sögn Fjár­mála­eftir­litsins. Þá er sam­einingin háð breytingum á lögum um SL líf­eyris­sjóð og eru samtöl við fjár­mála- og efna­hags­ráðu­neytið hafin vegna þess. Jafn­framt yrði sam­einingin til­kynnt Sam­keppnis­eftir­litinu.