Umræðan um áframhaldandi aðlögun íslenska ríkisins að Evrópusambandinu heldur áfram að klífa hæstu hæðir. Lesendur Viðskiptablaðsins muna ef til vill eftir að bent var á síðum blaðsins í byrjun þessa árs að Magnús Árni Skjöld Magnússon, formaður Evrópuhreyfingarinnar, hefði komið með ákaflega frumleg rök fyrir aðild Íslands að ESB í spjalli við Ólaf Arnarson, hlaðvarpsstjórnanda hjá DV. Rökin voru sem sagt sú að Ísland ætti að sækja um aðild svo hægt væri að tryggja jafnrétti kynjanna á meginlandinu. Magnús Árni var svo enn á ferðinni í vikunni en þá benti hann á þau óvæntu sannindi að Íslendingar væru fámenn þjóð og fátæk og því væri til mikils að vinna að fá aðgang að byggðaþróunarsjóðum Evrópusambandsins. Hrafnarnir sjá vart hvernig kjósendur geti staðist þennan málflutning og kveður hann skemmtilega á við stemmuna sem Össur Skarphéðinsson kvað á forsíðu tímaritsins Þjóðlífs sem birtist í nóvember 1989: „Getum enn grætt milljarða!“ Huginn og Muninn er einn af föstum ritstjórnardálkum Viðskiptablaðsins. Þessi pistill birtist fyrst í blaðinu sem kom út 20. maí 2026.