Nokkur stór utan­þings­við­skipti voru til­kynnt með bréf Síldar­vinnslunnar í morgun, áður en markaður opnaði og skömmu eftir opnun. Rétt eftir klukkan níu voru til­kynnt þrenn við­skipti með bréf félagsins á genginu 114,5 krónur á hlut. Fyrst skiptu ein milljón hlutir um hendur fyrir 114,5 milljónir króna, sem sam­svarar eðli málsins sam­kvæmt 114,5 milljón króna við­skiptum. Þá voru til­kynnt við­skipti með 200 þúsund hluti fyrir 22,9 milljónir króna og 576.134 hluti fyrir tæp­lega 66 milljónir króna. Skömmu eftir opnun markaðar var síðan til­kynnt um við­skipti með aðra milljón hluta á genginu 115 krónur á hlut, eða fyrir 115 milljónir króna. Sam­tals námu þessi fjögur við­skipti því um 318 milljónum króna. Bréf Síldar­vinnslunnar hækkuðu um tæp­lega 2% í fyrstu við­skiptum dagsins og stóðu í 115 krónum á hlut skömmu fyrir hálf ellefu. Velta með bréf félagsins nam þá 354 milljónum króna. Hækkunin kemur í kjölfar upp­gjörs félagsins sem birt var eftir lokun markaðar í gær. Síldar­vinnslan hagnaðist um 35,1 milljón evra á fyrsta árs­fjórðungi, jafn­virði um 5,1 milljarðs króna miðað við meðal­gengi evru á tíma­bilinu. Sjá einnig Hagnaðurinn fimm­faldaðist eftir góða loðnu­vertíð Af­koman batnaði veru­lega frá sama tíma í fyrra og skýrðist meðal annars af góðri loðnu­vertíð, sterkum bol­fisk­mörkuðum og góðri veiði bol­fisk­skipa. Félagið gerir ráð fyrir að EBITDA ársins verði á bilinu 105 til 115 milljónir evra.