Meiri­hluti utan­ríkis­mála­nefndar leggur til að spurningunni sem lögð verði fyrir þjóðina í fyrir­hugaðri þjóðar­at­kvæða­greiðslu um aðildar­viðræður við Evrópu­sam­bandið verði breytt. Í upp­runa­legri til­lögu var gert ráð fyrir að spurt yrði hvort Ís­land ætti að „halda áfram“ viðræðum um aðild að Evrópu­sam­bandinu. Sam­kvæmt breytingar­tillögu sem meiri­hluti nefndarinnar styður yrði spurningin hins vegar orðuð svo: „Á Ís­land að hefja á ný aðildar­viðræður við Evrópu­sam­bandið?“ Þetta kemur fram í um­fjöllun mbl.is , þar sem rætt er við Pawel Bar­toszek, for­mann utan­ríkis­mála­nefndar, að loknum fundi nefndarinnar í dag. Breytingin kemur í kjölfar þess að Landskjör­stjórn gerði at­huga­semdir við fyrra orðalag spurningarinnar. Með nýju orða­lagi er því horfið frá því að tala um að viðræðum verði „haldið áfram“ og þess í stað vísað til þess að þær verði „hafnar á ný“. Sjá einnig Bau­den­bacher segir ríkis­stjórnina villa um fyrir kjó­sendum um ESB Ítar­leg samnings­mark­mið sett fram Utan­ríkis­mála­nefnd af­greiddi í dag nefndarálit meiri­hlutans um málið. Pawel segir að þar sé bæði farið yfir sögu málsins og sett fram ítar­leg samnings­mark­mið og áherslur, komi til þess að þjóðin veiti ríkis­stjórninni um­boð til að hefja viðræður að nýju. Að sögn Pawels er nefndarálitið um 50 síður að lengd og verður birt á vef Alþingis. Meiri­hluti nefndarinnar styður jafn­framt að þjóðar­at­kvæða­greiðslan fari fram 29. ágúst, eins og lagt var upp með í upp­haf­legri til­lögu. Sú tíma­setning hefur sætt gagn­rýni, meðal annars frá stjórnar­and­stöðu. Segir gögnin ekki breyta af­stöðu til at­kvæða­greiðslu Minni­hluti utan­ríkis­mála­nefndar hefur mót­mælt af­greiðslu málsins úr nefnd og gagn­rýnt að upp­lýsinga­beiðnir séu enn útistandandi. Þá hafi um­fangs­mikil gögn borist nefndar­mönnum seint og lítill tími gefist til að fara yfir þau. Pawel segir við mbl.is að lang­flestar upp­lýsingar sem óskað hafi verið eftir séu komnar fram. Eftir­standandi beiðnir séu frá barna­málaráðu­neytinu og at­vinnu­vegaráðu­neytinu. Hann telur ólík­legt að þær upp­lýsingar sem enn vanti breyti af­stöðu til þess hvort þjóðin eigi að fá að greiða at­kvæði um málið. „Mér finnst afar ólík­legt að það sem þar kemur fram, til dæmis hvernig IBA-styrkjum frá árinu 2009 var háttað, eigi að breyta af­stöðu fólks til þess hvort þjóðin eigi að fá að taka ákvörðun um áfram­haldandi viðræður við Evrópu­sam­bandið eða hefja þær að nýju eins og nú er sagt,“ segir Pawel við mbl.is. Hann segir slíkar upp­lýsingar vissu­lega geta nýst í um­ræðunni síðar, en sér ekki að þær eigi að leiða til þess að spurningunni eða tíma­setningu at­kvæða­greiðslunnar verði breytt Segir tímalínuna hafa legið fyrir Pawel hafnar einnig því að nefndin hafi ekki átt að af­greiða málið vegna sveitar­stjórnar­kosninga. Hann segir þing­menn vera að störfum þótt þing­fundir liggi niðri vegna kosninganna. Tímalínan um að málið yrði af­greitt úr nefnd í maí hafi legið lengi fyrir. „Þannig að ég vil meina að það hafi öllum átt að vera ljóst að við vorum að halda okkur við þetta plan,“ segir hann. Af­greiðsla málsins úr nefnd þýðir að það getur nú farið áfram til um­ræðu í þing­sal. Þar verður tekist á um bæði efni til­lögunnar, orðalag spurningarinnar og hvort at­kvæða­greiðslan eigi að fara fram 29. ágúst. Sjá einnig ESB-til­laga úr nefnd þrátt fyrir ósvaraðar upp­lýsinga­beiðnir