Donald Trump, forseti Bandaríkjanna, segist íhuga alvarlega að draga Bandaríkin úr NATO þar sem önnur aðildarríki aðstoðuðu Bandaríkin ekki í stríði þeirra gegn Íran. Trump segir bandalagið vera pappírstígur. Hann átti sig vel því og segir Pútín Rússlandsforseta gera það sömuleiðis. Í viðtali við breska blaðið Telegraph segir Trump að Bretar „eigi ekki einu sinni sjóher. Þið eruð of gömul og áttuð flugmóðurskip sem virka ekki.“ Keir Starmer, forsætisráðherra Bretlands, brást við þessum orðum Trumps í morgun með því að segja að „NATO er skilvirkasta hernaðarbandalag sem sést hefur í heimssögunni.“ „Það hefur tryggt öryggi okkar í áratugaraðir og við erum að fullu skuldbundin NATO,“ sagði Starmer ennfremur. Trump hefur áður lýst þessum skoðunum en þó sjaldnast með eins eindregnum hætti og í viðtalinu sem birtist í morgun. Ummæli hans þar ríma vel við það sem Marco Rubio, utanríkisráðherra Bandaríkjanna, sagði í gær um samband Bandaríkjanna og NATO: „Það er engum vafa undirorpið, því miður, að þegar þessum átökum lýkur verðum við að hugsa þetta samband upp á nýtt.“ „Ef NATÓ snýst bara um að verja Evrópu, ef ráðist er á hana, en okkur síðan neitað um að nota herstöðvar aðildarríkja þegar við þurfum á þeim að halda, þá er það ekki mjög gott samkomulag. Það er erfitt að leggja lag sitt við það,“ sagði Rubio. Trump segir við Telegraph að hann sé ánægður með ummæli Rubios. Forsetinn hefur oft og tíðum sagt að NATO þurfi að styrkja og efast um sanngirni þess að framlög Bandaríkjanna til hernaðarmála beri þungann af samstarfi þeirra 32 ríkja sem eiga aðild að bandalaginu. Það var enda hann sem þrýsti fyrir nokkrum misserum á, að framlög ríkja til varnarmála skyldu hækkuð upp í 5% af landsframleiðslu þeirra. Trump hefur furðað sig á því að NATO-ríki hafi ekki komið Bandaríkjunum meira til aðstoðar í stríði þeirra í Íran sem hófst fyrir rétt rúmum mánuði. Margumrædd fimmta grein stofnsáttmála NATO kveður þó á um að árás á eitt aðildarríki sé í senn árás á þau öll. Þó voru það Bandaríkin sem hófu stríðið, sem nú hefur smitast um nær öll Mið-Austurlönd, með árásum sínum á Íran 28. febrúar. Fimmta greinin hefur aðeins einu sinni verið virkjuð í sögu NATO. Það var eftir hryðjuverkaárásirnar 11. september. Ríflega 1.100 hermenn frá öðrum aðildarríkjum en Bandaríkjunum féllu í þeim átökum sem fylgdu í kjölfarið í Afganistan.