Bresk stjórnmál voru einnig til umræðu, Keir Starmer forsætisráðherra beit hressilega frá sér í fyrirspurnatíma forsætisráðherra. Hann á annars undir högg að sækja þó að engar sláandi upplýsingar kæmu fram í skjölum sem birt voru í gær um aðdraganda ráðningar Peters Mandelsons sem sendiherra í Bandaríkjunum. Skipan Mandelsons var umdeild og hann var rekinn úr starfi vegna tengsla við kynferðisafbrotamanninn Jeffrey Epstein. Ótrúlegt ævintýri Bodø/Glimt í Meistaradeildinni Björn og Bogi byrjuðu þó á að ræða ótrúlegt fótboltaævintýri norska liðsins Bodø/Glimt. Liðið hefur náð stórkostlegum árangri í Meistaradeild Evrópu og verið sannkallað spútniklið. Bodö/Glimt fagnaði 3-0 sigri á Sporting frá Lissabon í Portúgal í gærkvöld. Norska liðið á því mjög góða möguleika á að koma sér í átta liða úrslit Meistaradeildarinnar. Hvað vakir fyrir Bandaríkjastjórn? Bandarískir ráðamenn hafa ekki talað skýrt um hver markmið þeirra eru með árásunum á Íran. Trump hefur meðal annars talað um að hann krefjist skilyrðislausrar uppgjafar klerkastjórnarinnar í Íran, „ unconditional surrender “. En þeir hafa einnig sagt að tilgangurinn væri að verja Bandaríkin fyrir yfirvofandi árásum Írana og gera klerkastjórninni ókleift að stunda hermdarverk með því að eyðileggja hernaðartæki þeirra, einkum dróna, flugskeyti og eldflaugar. Trump hefur gortað af því að Bandaríkjamenn hafi gjöreytt flugher og flota Írans. Engar líkur á uppgjöf klerkastjórnarinnar Fréttaskýrendur telja engar líkur á uppgjöf klerkastjórnarinnar. Mojtaba Khamenei hefur verið skipaður æðsti leiðtogi. Faðir hans Ali Khamenei gegndi embættinu en var drepinn í fyrstu árásum Bandaríkjamanna og Ísraelsmanna á Íran. Mojtaba Khamenei missti ekki aðeins föður sinn í árásinni heldur einnig eiginkonu og barn. Nýi leiðtoginn er því ekki talinn fús til uppgjafar eða samninga. Allar líkur eru á að harðlínumenn verði áfram við völd og ekkert bendir til þess að stjórntæki þeirra, byltingarvörður, her og lögregla, hafi verið veikt svo að líkur séu á að stjórnin falli. Það hafa verið fjölmargar árásir á herstöðvar og byltingarvarðliðið, einnig á lögreglustöðvar en það eru samt ekki merki þess að Ísrael og Bandaríkjunum hafi með loftárásunum tekist að veikja stórkostlega valdakerfi klerkastjórnarinnar. Þá er engin skipulögð stjórnarandstaða í Íran og vígamenn Kúrda segjast ekki ætla að ráðast gegn byltingarvarðliðum og her Írans. Viðbrögð Írana virðast hafa komið Bandaríkjastjórn í opna skjöldu. Bandaríkjastjórn virðist hafa misreiknað áhrif á olíuverð og ekki hafa hlustað á viðvaranir eigin leyniþjónustustofnana um líkleg viðbrögð Írana við árásum. Í fréttaskýringu New York Times segir: Það kom í ljós hversu illa Bandaríkjastjórn misreiknaði sig þegar Íranar hótaðu að skjóta á olíuflutningaskip sem sigldu um Hormuzsund. Í kjölfar hótana Írans hafa siglingar í Persaflóa stöðvast, olíuverð hefur hækkað verulega og stjórn Trumps hefur reynt að finna leiðir til að draga úr efnahagskreppu sem hefur leitt til hærra bensínverðs fyrir Bandaríkjamenn. Þröngir kostir Breska tímaritið Economist segir kosti Trumps til að lækka olíuverð eru séu afar takmarkaðir. Aðrir benda á að mjög erfitt verði að tryggja að skip geti siglt óhindrað um Hormuz-sund. Sundið sé er í raun aðeins 11 kílómetrar á breidd og það sé auðvelt að trufla umferð skipa með fljótandi tundurduflum, árásum fjarstýrðra smábáta og kafbáta. Íranir áttu fyrir árásirnar 25 kafbáta, sem flestir eru smákafbátar. Óvíst er hvort Bandaríkjamönnum hafi tekist að granda þeim öllum þrátt fyrir digurbarkalegar yfirlýsingar um hernaðarsigra. Erfitt að halda Hormuz-sundi opnu fyrir siglingar Hernaðarsérfræðingur Sky-fréttastofunnar segir að það yrði umfangsmikil hernaðaraðgerð að halda Hormuz-sundinu opnu, það þyrfti talsverðan fjölda tundurspilla sem eru sérhæfðir til loftvarna gegn drónum, flugskeytum og eldflaugum, stöðuga gæslu orrustuflugvéla til að ráðast á skip og báta á siglingu. Skipalestir þyrftu að fara um sundið og hætta yrði á hörðum átökum. Margt bendir til að Bandaríkjamenn beri ábyrgð á árás á stúlknaskóla Donald Trump hefur sakað Írana um að hafa gert árásina á Shajerah Tayyebeh-stúlknaskólann í borginni Minab 28. febrúar. Flest bendir þó til þess að bandarísk Tomahawk-stýriflaug hafi hæft skólabygginuna. Samkvæmt rannsóknum óháðra miðla studdist Bandaríkjaher við úrelt gögn við loftárásir á skólann. Írönsk stjórnvöld segja 175 hafa beðið bana í árásinni, að mestu nemendur í skólanum sem voru stúlkur á aldrinum 7–12 ára. Fjör í breska þinginu Fyrirspurnartími forsætisráðherra í breska þinginu í gær var líflegur eins og oft er. Lindsay Hoyle, forseti þingsins, þurfti margoft að þagga niður í óstýrilátum þingmönnum. Það endaði með því að hann þurfti að vísa Peter Swallow, þingmanni Verkamannaflokksins, út úr salnum þegar Hoyle ofbauð hversu baldinn hann var. Starmer í miklum ham í þinginu Keir Starmer var í fínu formi í fyrirspurnartímanum þrátt fyrir að mörg spjót standi á honum. Hann lét leiðtoga Íhaldsflokksins og Umbótaflokksins, Kemi Badenoch og Nigel Farage, heyra það hressilega. Starmer sagði þau bæði hafa í fyrstu stutt árásir Bandaríkjamanna og Ísraelsmanna á Íran og hefðu krafist þess að Bretar tækju þátt í árásunum. Viku seinna hefðu þau bæði snúið við blaðinu. Starmer sagði flokkana stútfulla af misheppnuðum Íhaldsmönnum sem lytu forystu fólks sem ekki væri hæft til að gegna stöðu forsætisráðherra. Í lokin fékk Badenoch mikla dembu frá forsætisráðherra sem nýtti sér að hún var búin með sinn ræðutíma og gat ekki svarað. Mandelson-skjölin birt í Bretlandi Fyrstu skjölin sem tengjast skipun Keir Starmers forsætisráðherra Bretlands á Peter Mandelson í starf sendiherra í Bandaríkjunum voru birt í þann mund sem fyrirspurnartími forsætisráðherra stóð yfir og það hefur örugglega verið með ráðum gert svo það yrði ekki til umræðu. Mandelson var skipaður sendiherra í lok árs 2024 og var rekinn í september í fyrra vegna tengsla hans við kynferðisbrotamanninn Jeffrey Epstein. Þegar Mandelson var ráðinn var vitað að hann hefði verið í samskiptum við Epstein eftir að þó að hann hafði verið dæmdur fyrir kynferðisbrot gegn ungum stúlkum árið 2008. Starmer var varaður við Í skjölunum kemur fram að Keir Starmer var varaður við því áður en hann ákvað að ráða Mandelson sem sendiherra í Bandaríkjunum að það gæti haft áhrif á orðspor landsins vegna tengsla hans við Epstein. Engu að síður ákveður Starmer að skipa hann í embættið - hann vissi líka þá að Mandelson hafði verið í sambandi við Epstein eftir að hann var dæmdur. Mandelson var handtekinn í febrúar vegna gruns um misferli í opinberu starfi. Hér má heyra Heimsglugga vikunnar Björn Þór Sigbjörnsson og Bogi Ágústsson ræddu í Heimsglugganum ýmsar hliðar og afleiðingar árása Bandaríkjamanna og Ísraelsmanna á Íran. Hráolía hefur hækkað mikið í verði og óttast er að það leiði til umtalsverðrar verðbólgu um allan heim.