Það er brýnt að bæta aðstoð og upplýsingaflæði til erlendra lækna og heilbrigðisstarfsfólks, segir yfirlæknir sérnámsgrunnslækna á Landspítalanum. Hún segir skort á íslenskukunnáttu það helsta sem verði til þess að erlendir læknar fái ekki starf innan heilbrigðiskerfisins. Vinnur við þjónustustörf þrátt fyrir að vera læknir Í sjónvarpsfréttum á dögunum var rætt við Dariu Peremot, úkraínskan háls-, nef- og eyrnalækni, sem segist ekki fá vinnu sem slíkur hér á landi þrátt fyrir að hafa tekið stöðupróf og fengið starfsleyfi sem læknir. Hún hefur verið á Íslandi í tæplega fjögur ár og vinnur við þjónustustörf. Hún segist gjarnan vilja nýta læknismenntun sína og hæfileika og gagnrýnir hversu flókið fyrirkomulagið er hér á landi. Íslenskt heilbrigðiskerfi opið fyrir því að fá erlent starfsfólk til starfa Inga Sif Ólafsdóttir, lungnalæknir og yfirlæknir sérnámsgrunnslækna á Landspítala, segir móttöku hér á landi almennt góða og íslenska heilbrigðiskerfið sé opið fyrir því að fá erlent starfsfólk til starfa. Hún segir mikla byltingu hafa orðið árið 2023, þegar ný reglugerð tók gildi sem kvað á um aðlögunartímabil læknismenntaðs fólks sem kemur frá löndum utan ESB og EES. „Þetta aðlögunartímabil er sex mánuðir og viðkomandi fær ekki lækningaleyfi fyrr en eftir að hann hefur lokið því tímabili. Þetta tímabil er til að meta klíníska færni einstaklingsins, hvort hún samrýmist þeim stöðlum sem eru á Íslandi - og það er mjög mikilvægt að þetta sé vel gert.“ Skilgreint sé í reglugerðinni að viðkomandi þurfi að vera undir handleiðslu læknis með fullgilt lækningarleyfi. „Þetta er bara heilmikið ferli að tryggja það að loknum þessum sex mánuðum geti viðkomandi starfað að fullu öryggi í íslensku heilbrigðiskerfi og þetta er bara svakalega mikilvægt því að erlendir læknar, við viljum að þeir komi hérna, þeir séu öryggisstarfsmenn þannig að við getum tryggt öryggi sjúklinga á sem bestan hátt.“ Til að tryggja öryggi sjúklinga þurfi góða tungumálakunnáttu segir Inga Sif. En það sé það sem helst hefur vantað upp á hjá erlendu heilbrigðisstarfsfólki „Við á Landspítalanum gerum kröfu um B2-tungumálafærni í íslensku sem er á pari við það sem ætlast er til í nágrannalöndum okkar, þá á ég við Noreg og Danmörku. Við höfum gert þessar kröfur um B2-tungumálafærni og það hefur eiginlega verið það sem hefur stoppað flesta í að koma inn á aðlögunartímabil hjá okkur.“ Komi erlendum læknum á óvart að íslenskukunnáttu sé krafist Inga Sif segir að um helmingur þeirra sem hafa verið ráðnir inn á Landspítalann hafi klárað aðlögunartímabilið og er starfandi á starfsnámsgrunni í dag. „Mér finnst alltaf sárt að taka viðtal við þessa einstaklinga þegar það er kannski töluverður tími liðinn frá því að viðkomandi kom til landsins. Fólk er búið að leggja á sig eða læra ensku til að taka ákveðið þekkingarpróf en svo virðist það koma því á óvart að það þurfi að læra íslensku til að starfa sem læknir innan íslensks heilbrigðiskerfis.“ Runólfur Pálsson, forstjóri Landspítalans, sagði í samtali við fréttastofu í dag að bæta þurfi ferlið fyrir heilbrigðismenntað starfsfólk sem hingað komi til lands þannig að fólk fái viðeigandi upplýsingar og aðstoð til að fá starf í íslensku heilbrigðiskerfi. Inga Sif tekur undir með Runólfi. „Við gætum staðið okkur betur í að veita þessum einstaklingum betri leiðbeiningar og leiðsögn innan heilbrigðiskerfisins hérna, um hvað er í boði og hvað er hægt að gera.“ Þá þyrfti einnig að bæta tækifæri til íslenskukennslu. „Til þess að læra íslensku sem nýtist einstaklingum í heilbrigðiskerfinu til starfa þannig að fólk eigi tök á að læra íslenskt tungumál upp að þessari færni. Svo getum við ekki litið fram hjá því að það fylgir þessum málaflokki ekkert fjármagn frá ríkisstjórninni. Það fylgir ákveðinn kostnaður því að taka inn lækna á aðlögunartímabili, og það er bara mörgum heilbrigðisstofnunum nokkuð stór biti að taka.“